Barcelona nuk mund të rikthehet në rregullin 1:1 para muajit gusht, konfirmon drejtori i Korporatës, Manel del Rio.

Duke folur për Diario AS, Del Rio deklaroi: “Do të jemi në rregullin 1:1 në gusht,” duke konfirmuar raportimet e mëparshme të Tribuna.com.

Kjo do të thotë se Barcelona nuk do të jetë në gjendje të regjistrojë transferime të reja në La Liga deri në muajin gusht – vetëm një javë para fillimit të sezonit të ri – përveç nëse ka ndonjë përparim të parakohshëm.

Klubi katalanas po mbështetet te të ardhurat nga shitja e vendeve VIP në Camp Nou, të cilat pritet të realizohen në fund të korrikut.

Megjithatë, këto të ardhura nuk do të konfirmohen zyrtarisht derisa të zhvillohet Trofeu Joan Gamper në fillim të gushtit.

Përveç kësaj, Barcelona duhet gjithashtu të ulë faturën e pagave, dhe për këtë arsye po përpiqet të bindë lojtarë me paga të larta, si Marc-Andre ter Stegen, të largohen nga klubi. /Telegrafi/